Komisioneri i Bashkimit Evropian për Zgjerimin, Oliver Varhelyi, është shprehur optimist se deri në muajin qershor Maqedonia e Veriut dhe Bullgaria do të arrijnë një marrëveshje që do të mundësonte hapjen e negociatave me Tiranën dhe Shkupin.
Zyrtari i lartë i Brukselit u takua në Sofje me presidentin Rumen Radev, kryeministrin Kiril Petkov dhe ministren e Jashtme, për të gjetur sipas tij një gjuhë të përbashkët që do të rezultonte në heqjen e vetos bullgare.
OLIVER VARHELYI
KOMISIONER I BASHKIMIT EUROPIAN PËR ZGJERIMIN“Për Bashkimin Evropian është shumë e rëndësishme që të kemi një Ballkan të qëndrueshëm dhe të suksesshëm. Në këtë mënyrë, mbajtja e konferencës së parë ndërqeveritare për Maqedoninë e Veriut dhe Shqipërinë do të ishte një kontribut i madh. Ne po punojmë intensivish t për një zgjidhje të pranuar reciprokisht.”
Por në Shkup skepticizmi është i lartë, ndaj dhe autoritetet kërkojnë një ndërhyrje të fortë nga Brukseli zyrtar.
DIMITAR KOVAÇEVSKI
KRYEMINISTER I MAQEDONISE SE VERIUT“Realiteti i ri gjeopolitik në botë, veçanërisht në Evropë, duke pasur parasysh agresionin rus, sigurisht që kërkon që Bashkimi Evropian të marrë në konsideratë vendimet e saj të mëtejshme. Zgjerimi i Ballkanit Perëndimor, edhe hapja e negociatave për vendet kandidate, ku jemi edhe ne pjesë, duhet të merren seriozisht në konsideratë.”
Një sinjal pozitiv për një zgjidhje të mundshme të konfliktit është dhënë përmes vizitës që po zhvillon në Bullgari ministrja e Mbrojtjes së Maqedonisë së Veriut, Sllavjanka Petrovska.
