Policia e Tiranës ka bërë apel për kujdes të shtuar dhe bashkëpunim nga qytetarët për kapjen e autorit të dyshuar të vrasjes së 27-vjeçarit Ardian Baloshi në Kamëz.
Sipas policisë, Sadik Llanaj dyshohet se është i armatosur dhe me rrezikshmëri të lartë, ndërsa për informacion që çon në lokalizimin dhe arrestimin e tij është vënë në dispozicion një shpërblim prej 10 mijë eurosh.
Njoftimi i policisë
Apel për kujdes dhe bashkëpunim për kapjen e autorit të dyshuar të vrasjes së 27-vjeçarit në Kamëz.
Nisur nga rrezikshmëria e lartë e autorit të dyshuar për vrasjen e shtetasit A. B., 27 vjeç, Drejtoria Vendore e Policisë Tiranë apelon ndaj qytetarëve të Kamzës dhe zonave përreth që të tregojnë kujdes të shtuar, pasi autori i dyshuar, shtetasi Sadik Llani, dyshohet se është i armatosur dhe konsiderohet person me rrezikshmëri të lartë shoqërore.
Për lokalizimin dhe kapjen e tij janë angazhuar Forca Kombëtare e Sigurisë “RENEA”, strukturat operacionale të Policisë së Shtetit dhe shërbimet e Drejtorisë Vendore të Policisë Tiranë, të cilat po vijojnë kontrollet intensive në terren.
Drejtoria Vendore e Policisë Tiranë kërkon bashkëpunimin e qytetarëve që, nëse konstatojnë këtë shtetas ose disponojnë informacion mbi vendndodhjen e tij, të mos ndërhyjnë në asnjë mënyrë, por të njoftojnë menjëherë Policinë në numrin 069 41 05 735 ose në numrin pa pagesë 112.
Drejtoria Vendore e Policisë Tiranë vë në dispozicion një shpërblim prej 10 000 eurosh për informacionin e saktë që do të çojë në lokalizimin dhe kapjen e autorit të dyshuar.
Policia e Tiranës garanton ruajtjen e plotë të konfidencialitetit për çdo informacion të dhënë nga qytetarët.
Çfarë ndodhi sot në Kamëz
Ardian Baloshiu qëllua nga Sadik Llanaj me breshëri kallashnikovi dhe si pasojë e plagëve të marrë ndërroi jetë.
27-vjeçari u dërgua në spitalin e Traumës nga banorët e zonës, por mbërriti pa shenja jete.
Kreu i policisë së Tiranës, Oliger Torba tha se shkak i ngjarjes dyshohet një konflikt për motive të dobëta.
“Në spital e Traumës ka shkuar pas shenja jete Ardian Balloshi rreth 27 vjeç. Nga konstatimet dëmtimet i ka pasur me armë zjarri. Duke pasur parasysh rrezikshmërinë e autorit, është gjykuar që në operacion të marrin pjesë dhe forcat RENEA. Ngjarja ka ndodhur në rrugë. Janë të dy banorë të zonës. Autori ka qenë me automjet. Nuk ka të plagosur të tjerë. Viktima është dërguar në spital me automjet privat nga qytetarë të rastit”, tha Torba.
Përpara një viti autori dhe viktima kanë patur një debat me njëri-tjetrin, ndërkohë që këtë të hënë, 27-vjeçari ka qënë duke qëndruar përpara lokalit të zonës në momentin kur autori ka ardhur me automjet dhe pasi ka qëlluar është larguar menjëherë.
