Kryeministri Edi Rama, gjatë fjalës së tij në Shkodër në takimin me socialistët në kuadër të 35-vjetorit të PS, është ndalur edhe te protestat që po zhvillohen në Tiranë dhe në disa qytete të Shqipërisë.
Rama theksoi se i kupton shqetësimet e qytetarëve, por nuk pranon pjesën ku PS akuzohet për “shitje të atdheut”, pasi është forca politike që, sipas tij, e ka treguar ndër vite se nuk e ka tradhtuar kurrë interesin kombëtar.
Ai ironizoi edhe ata që, sipas tij, duan të kapin protestën, duke shtuar se sot janë bërë papritur ambientalistë, por kanë heshtur kur në Shqipëri nuk kishte zogj.
“Ishte një patriot dje që thoshte se Rama po ul çmimet e biletave që të ikim nga Shqipëria, por çfarë do ky patrioti? Që të rrisnim çmimet? Jetojmë në një hapësirë ku themi gjithçka, por nuk mbajmë përgjegjësi për atë që themi.
Shpërthyen papritur ambientalistët dhe ata që bërtasin ‘Çohuni nga kafet’, mos rrini ulur, ‘Për Shqipërinë e Re’, po për çfarë? Si papritur këta u zgjuan një ditë dhe të gjithë u bënë ambientalistë, dhe po kërkojnë shpëtimin e Shqipërisë nga unë dhe nga ju.
Ku ishin këta kur në Shqipëri kërciste gjuetia ilegale dhe vriteshin përditë zogj e kafshë që janë specie të mbrojtura? Ku ishin këta kur Shqipëria kishte në fuqi ligjin e importit të plehrave? Ku ishin këta kur pyjet ishin vendi ku dëgjohej vetëm sharra elektrike?
Nuk i kërkon askush llogari atyre që në atë kohë ishin 10-vjeç. Unë nuk e kam me ta, por me ata që po bëjnë çmos që të marrin peng dhe ta çojnë në drejtim të paditur atë shqetësim të natyrshëm dhe nevojë legjitime të shumë qytetarëve që u ndien papritur përpara një alarmi.
Sepse papritur morën vesh që ka një plan djallëzor për të ‘shitur’ Shqipërinë, për të shkatërruar një habitat natyror, e pastaj për të sjellë aty ca thoshin palestinezë, ca izraelitë, ca masivë betoni. I kuptoj ata, i kuptoj ditën e parë, por nuk i kuptoj më kur shkojnë mbas berihait dhe kur, ca nga fakti që nuk dinë, ca nga fakti që nuk duan ta dëgjojnë, harrojnë se me kë kanë të bëjnë.
Kur them me kë kanë të bëjnë, kam parasysh ekzaktësisht veten time, qeverinë tonë, shumicën qeverisëse. Harrojnë që kanë të bëjnë me një forcë që mund ta kritikosh për shumëçka, por nuk mund t’i drejtosh gishtin si një forcë që ka tradhtuar interesin kombëtar. Nuk e ka bërë dje, nuk e ka bërë sot dhe nuk e ka bërë kurrë”, tha Rama.
