Një gjykatë në Britani shpalli fajtore 26-vjeçaren Aleksandra Walker dhe partnerin e saj 22-vjeçar, Harrison Simpson, për vrasjen e vajzës dyvjeçare Izabel. Sipas vendimit, Simpson u dënua edhe për sulm seksual ndaj të miturës, ndërsa Walker u shpall e pafajshme vetëm për këtë akuzë.
Ngjarja tronditëse u zbulua më 13 shtator 2025, kur ekipet e emergjencës gjetën Izabel pa puls në fund të shkallëve të banesës. Prokuroria deklaroi se nëna vonoi të thërriste ambulancën, megjithëse kishte kërkuar në internet për gjakderdhjen e fëmijës dhe kishte telefonuar fillimisht njerkun e saj.
Mjekët konstatuan se vajza kishte mavijosje në të gjithë trupin, plagë në kokë, qafë, bark dhe organet gjenitale, ndërsa autopsia zbuloi se ajo kishte pësuar 21 fraktura në javët para vdekjes. Ekspertët thanë se fëmija ishte tronditur me forcë dhe kishte marrë një goditje fatale në kokë.
Gjatë gjykimit u bë e ditur se Walker kishte dyshuar se partneri i saj mund të ishte pedofil, por nuk i dha fund lidhjes. Vetëm pak ditë para vdekjes së Izabel, ajo ishte dërguar në spital me këmbë të thyer, ndërsa gjyshja kishte shprehur shqetësimin se vogëlushja “dukej sikur po keqtrajtohej”.
Sipas hetimeve, natën para ngjarjes çifti kishte konsumuar alkool dhe kanabis. Gjykatësja falënderoi jurinë për trajtimin e një çështjeje kaq të rëndë dhe njoftoi se dënimi i të pandehurve do të shpallet të enjten.
/vizionplus.tv
