SHBA-ja dhe Arabia Saudite kanë kryer së bashku sulme ajrore në Irak kundër një grupi militant të lidhur me Iranin. Ky veprim mund të rrisë tensionet mes SHBA-së dhe Iranit në rajon, shkruan BBC.
Komanda Qendrore e SHBA-së (CENTCOM) njoftoi se sulmet kishin në shënjestër “terroristë të lidhur me Iranin”, të cilët, sipas saj, drejtohen nga Garda Revolucionare Islamike e Iranit (IRGC) dhe kishin kryer sulme ndaj forcave amerikane dhe objekteve energjetike saudite.
Edhe pse SHBA-ja nuk e përmendi emrin e grupit të goditur, Forcat e Mobilizimit Popullor të Irakut (PMF) thanë se të paktën 10 nga anëtarët e saj u vranë gjatë sulmeve.
Ky zhvillim vjen pasi Irani lëshoi disa raketa balistike drejt forcave amerikane në Lindjen e Mesme.
Ndërkohë, Garda Revolucionare Islamike e Iranit pretendoi gjithashtu se kishte goditur tre anije nafte në Ngushticën e Hormuzit, një nga rrugët më të rëndësishme të transportit të energjisë në botë.
Sipas ushtrisë amerikane, avionët luftarakë amerikanë dhe sauditë goditën disa baza logjistike dhe depo armësh në lindje të Irakut. SHBA-ja tha se sulmet ishin një kundërpërgjigje ndaj më shumë se 30 sulmeve me dronë të kryera gjatë 72 orëve të fundit kundër forcave amerikane dhe interesave saudite.
CENTCOM paralajmëroi se Irani dhe grupet aleate të tij duhet të ndalojnë sulmet për të shmangur reagime të tjera ushtarake nga SHBA-ja.
Forcat e Mobilizimit Popullor janë një aleancë e disa milicive kryesisht pro-iraniane në Irak, të cilat prej vitesh konsiderohen pjesë e rrjetit të grupeve të mbështetura nga Teherani në Lindjen e Mesme. Këto grupe kanë sulmuar disa herë personelin dhe interesat amerikane në Irak, ndërsa SHBA-ja është kundërpërgjigjur me sulme ajrore.
Frika për një përshkallëzim të konfliktit ndikoi menjëherë edhe në tregjet e energjisë. Çmimi i naftës Brent u rrit me rreth 4.3%, duke arritur në 87.70 dollarë për fuçi, ndërsa nafta amerikane u rrit me 4.2%, në 82.62 dollarë për fuçi.
Sulmet e fundit ndodhën në të njëjtën kohë me vizitën e kryeministrit izraelit Benjamin Netanyahu në Uashington, ku ai u takua me Trumpin në Shtëpinë e Bardhë.
