Në Gjykatën e Posaçme Kundër Korrupsionit dhe Krimit të Organizuar po zhvillohet seanca gjyqësore ndaj ish-presidentit Ilir Meta dhe ish-deputetes Monika Kryemadhi.
Gjatë seancës, Kryemadhi ka paraqitur kundërshtimet e saj ndaj aktakuzës, duke u ndalur te çështja e marrëveshjes për fibrat optike me kompaninë UNIFI të Adrian Shatkut.
Sipas saj, akuza e SPAK është ndërtuar mbi interpretime dhe deduksione të komunikimeve elektronike.
Kryemadhi: Edhe pse SPAK pretendon se çështja e fibrës optike është e parashkruar, e ka përfshirë në aktakuzë për të na rënduar pozitat. Akuza paraqet një SMS ku thuhet: ‘U firmos nga të gjithë ministrat’. Adrian Shatku më përgjigjet: ‘Shkëlqyer’. Sipas akuzës, kjo konsiderohet vepër penale. Në fakt, kjo VKM nuk u miratua nga Ministria e Inovacionit. Për një SMS të datës 11 prill 2014 që lidhet me qëndrimin e Milena Haritos, SPAK citon një komunikim të Adrian Shatkut. Në përmbajtjen e tij pasqyrohet mendimi i Adrian Shatkut mbi këtë qëndrim. SPAK ka shkëputur një pjesë të komunikimit që i shërben akuzës, ndërkohë që kronologjia e mesazheve është krejt ndryshe.
Një tjetër pikë e kundërshtuar prej saj ka qenë një mesazh ku Adrian Shatku e pyet: “A ke folur me Engjëllin?”.
Kryemadhi ka deklaruar se nuk i është përgjigjur këtij mesazhi dhe se në listën e kontakteve të saj ka disa persona me këtë emër.
Në mbrojtjen e saj, ish-deputetja ka ngritur edhe pyetje mbi mënyrën e interpretimit të komunikimeve elektronike si prova penale, duke sjellë si shembull edhe email-et që lidhen me çështjen e inceneratorëve.
Kryemadhi: Nëse sot më merrni email-et e mia, ku kam folur për inceneratorët, çfarë do të thotë kjo? Që kam kryer korrupsion për dherat apo për djegësit?.
