Shqipëria do të përjetojë rritjen më të ulët ekonomike gjatë vitit 2023, krahasuar me vendet e tjera të rajonit. Ky është parashikimi i zymtë që Banka Botërore bën në raportin mbi Perspektivën Ekonomike Globale për këtë vit.
Por eksperti i ekonomisë Ardian Civici në një lidhje live për Vizion Plus u shpreh se jo vetëm Shqipëria, por edhe vendet e tjera të rajonit do kenë rritje të ulët ekonomike, me përjashtim të Kosovës.
“Me përjashtim të Kosovës, të gjitha vendet e tjera me nivelin 2.2-2.4% është parashikuar rritja ekonomike. Ashtu si BB edhe FMN dhe institucione të tjera janë me të njëjtën linjë që ekonomia botërore ka hyrë në një fazë të vështirë dhe 6 mujori i vitit 2023 do ketë një situatë ekonomike më të rëndë”, tha Civici.
Sipas ekspertit, turizmi dhe ndërtimi janë sektorët që kanë pasur performancë më të mirë ekonomike për vendin, ndërsa renditi edhe ato më problematike.
“Në Shqipëri turizmi ka dhënë rezultate. Edhe në 2023 turizmi do jetë një sektor me rëndësi. Edhe ndërtimi ka dhënë rezultate pozitive. Më problematik ngelet industria, transporti dhe shërbimet që zënë masën 45% në PBB. Vëmendja duhet të përqëndrohet në lehtësimin e klimës së biznesit e kombinuar me investimet dhe konsumin”, tha Civici.
Eksperti më tej theksoi se fundi i vitit 2023 dhe 2024 do ketë një rikthim pozitiv të situatës ekonomike, njëjtë me atë të vitit 2018-2019.
“Në fund të vitit 2023 dhe viti 2024 do të rikthehet një situatë pozitive ekonomike, një rimëkëmbje siç ka qenë në vitin 2018-2019. Rikthimi nuk do jetë automatik. Mos harrojmë që ekonomia tashmë ka hyrë në një fazë të re”.
