Përballë reagimit të ashpër të UEFA-s dhe të një pjese të federatave dhe konfederatave të futbollit në disa kontinente, kreu i FIFA-s Xhani Infantino u detyrua të reagonte publikisht mbi krijimin e “FIFA Forward Enterprise”, një kompani tregtare që synon të marrë deri në 20% të Kupës së Botës.
Kompania synon të menaxhojë ekskluzivisht të drejtat dhe makinerinë organizative të Kupës së Botës dhe Kupës së Botës për Klube, me qëllim që FIFA të mbledhë në total 4.2 miliardë dollarë.
“Shpirti dhe qeverisja e futbollit nuk janë asete që duhen nxjerrë në treg, veçanërisht në mungesë të transparencës së plotë në lidhje me atë se kush do të përfitonte financiarisht”, shkruante mes të tjerash në reagimin e saj të fortë UEFA.
Një qëndrim që e detyroi presidentin e FIFA-s të sqaronte zyrtarisht pozicionin e tij dhe të institucionit që ai drejton. Ai e quajti planin për të shitur aksione në Kupën e Botës një propozim, por jo një detyrim.
“Është pjesë e një procesi demokratik, një procesi konsultimi dhe mbi të gjitha, është një mundësi, por jo një detyrim. Futbolli është sporti më popullor në botë dhe një motor i jashtëzakonshëm i zhvillimit njerëzor dhe shoqëror. Puna jonë është të sigurohemi që pjesa tjetër e futbollit të rritet bashkë me të. FIFA ekziston për të mbështetur zhvillimin e qëndrueshëm dhe gjithëpërfshirës në çdo cep të botës.”
E megjithatë, pavarësisht këtij sqarimi të Infantinos dhe tentativës për të mbrojtur projektin e shumëdiskutuar, UEFA jo vetëm nuk e ka zbutur reagimin e saj, por ka dalë me një tjetër qëndrim edhe më të fortë. Qeveria europiane e futbollit bëri të ditur se do të bojkotojë të gjitha aktivitetet e rëndësishme futbollistike të organizuara nga FIFA, derisa Infantino të tërhiqet nga plani për të shitur aksionet e organizimit të Kupës së Botës tek fonde apo investitorë privatë.
“Kupa e Botës nuk është në shitje”, këmbënguli qeveria europiane e futbollit, duke i bërë një oponencë të fortë planit ambicioz, por shumë të diskutuar, të Xhani Infantinos për të grumbulluar mbi 40 miliardë dollarë nga shitja e 20% të aksioneve të organizimit të Kupës së Botës dhe Botërorit të Klubeve.
/vizionplus.tv
