Gazetari Klevin Muka, i ftuar në studion e QUO VADIS në Vision Plus ka komentuar reformën e propozuar për riorganizimin territorial, ku pritet të shkrihen 15 bashki.
Muka tha se qëllimi mund të ketë qenë bashkimi i disa bashkive, por duke krijuar perceptimin se disa prej tyre u mbrojtën gjatë procesit.
Gazetari solli si shembull bashkinë e Memaliajt dhe Tepelenës, duke theksuar se bashkimi i tyre mund të krijojë vështirësi për qytetarët dhe të prekë veçoritë historike e sociale të zonave.
“Nxorrën disa teori që jo po do zhbëhet bashkia, do zhbëhet Mirdita, do zhbëhet Tepelena, Skrapari, që janë zona kulturalisht me një rol të rëndësishëm në aktivitetin kulturor, etimologjik shqiptar dhe historik gjithashtu. Kështu që besoj se ky ka qenë qëllimi, që të shkrihen disa bashki, por të paktën thuhet që ‘shiko se nuk u bë ajo që u tha fillimisht, ne i mbrojtëm këto bashkitë dhe kemi lënë këtë tjetrën’. Gjithsesi, besoj se sot është shumë e vështirë. Për shembull, marr parasysh bashkinë e Memaliajt dhe bashkinë e Tepelenës, duke qenë se unë vij nga ajo zonë vetë. Për një qytetar nga Gllava, që është diku te 30 km larg nga Berati, të shkojë edhe të marrë në gjendje civile në Tepelenë një shërbim. Pse? Nuk besoj se edhe në aspektin historik bashkia e Memaliajt, për shembull, ka pasur tjetër tipologji, tjetër qasje politike në vitet e para të komunizmit. Është kryengritja e fundit komuniste e bërë në vitin ’48, Kryengritja e Shabokikës. Pra është ngjarje historike që veçon aspektin politik edhe social nga Tepelena. Kanë pasur tjetër qasje edhe tjetër përballje me komunizmin. Në aspekt historik besoj se ndryshojnë shumë edhe në origjinë, edhe besoj se edhe qytetet e tjera me radhë kanë tjetër historik”, tha gazetari Klevin Muka.
/vizionplus.tv
