Ndërsa tensionet mes SHBA dhe Koresë së Veriut janë në kulmin e tyre, ushtria e Shteteve të Bashkuara dhe ajo e Koresë së Jugut, kanë nisur një stërvitje të përbashkët ushtarake ajrore në brigjet e gadishullit Korean.
Stërvitja e specializuar vjen në mesin e tensioneve pas testimit të një rakete balistike të Koresë së Veriut rreth një javë më parë, e cila arriti një lartësi më të madhe nga testimet e kaluara.
Zyrtarë të ushtrisë amerikane thanë se avionëve F22 i janë bashkuar edhe ata F35, të cilët nuk identifikohen nga radarët e që shënojnë njëherësh majën e teknologjisë ajrore luftarake amerikane.
Ende nuk dihet numri i saktë i avionëve amerikanë të përparuar që ndodhen në Gadishull, por, mendohet se ai është më i larti që ka qenë ndonjëherë në Korenë e Jugut.
Një gjë e tillë, sipas zyrtarëve Amerikanë, po e shtyn gadishullin drejt luftës bërthamore, ndaj dhe senatori republikan Lindsey Graham kërkoi nga Pentagoni tërheqjen e familjarëve të personelit amerikan nga Koreja e Jugut.
Pheniani vazhdon programin bërthamor edhe pas sanksioneve ekonomike të këshillit të OKB-së. Vetëm pak muaj më parë, vendi komunist testoi 6 raketa balistike, si dhe kërcënoi me shkatërrim SHBA-të dhe Aleatët e saj.