Gjykata e Posaçme ka dënuar me burgim të përjetshëm Altin Hajrin, duke e shpallur fajtor për vrasjen e Jan Prengës, ngjarje e ndodhur në janar të vitit 2020.
Sipas Prokurorisë, Prenga u rrëmbye në Kamëz dhe më pas u transportua në kompleksin “Golden” në Shijak, në pronësi të Altin Hajrit, ku besohet se humbi jetën si pasojë e dhunës. Trupi i tij ende nuk është gjetur.
Prokuroria u shpreh se Altin Hajri kishte rol kyç në organizimin dhe ekzekutimin e rrëmbimit, duke vënë në dispozicion ambiente dhe mjete që u përdorën në krim.
Nga ana e tij, Hajri i ka mohuar akuzat gjatë gjithë procesit gjyqësor. Përmes avokatit mbrojtës, ai ka deklaruar se nuk ka pasur dijeni për planin e rrëmbimit dhe se nuk ka qenë i përfshirë në këtë ngjarje.
Megjithatë, për Gjykatën e Posaçme, provat e paraqitura nga prokuroria ishin të mjaftueshme për ta shpallur fajtor për akuzat e ngritura.
/vizionplus.tv
