Mësuesi turk, Harun Çelik, që u ekstradua nga Shqipëria në Turqi nuk disponon asnjë dokument zyrtar që të provojë kërkesën e tij për azil politik në vendin tonë.
Një pohim të tillë e bëri ministri i Brendshëm, Sandër Lleshaj në studion e emisionit “Kapital”. Ai sfidoi avokatët e Çelik që ta provojnë diçka të tillë në gjykatë.
“Jam informuar për këtë rast nga media sepse policia nuk merr leje tek ministri për të vepruar. Pastaj jam interesuar dhe kam parë që rasti është qartësisht i amplifikuar nga media. Ai ka qenë në kushtet e paligjshmërisë së plotë. Nuk ekziston asnjë dokument që të provojë që ai ka aplikuar për azil. Avokatët e tij, për fat të mirë Shqipëria është një vend i lirë ku ka gjykata, dhe mund ta provojnë këtë. Kërkesat për azil nuk janë verbale, por janë të shkruara. Ka jo një, jo dy, jo 10, jo 100, por mijëra qytetarë shqiptarë që dëbohen nga shtetet e tjera për arsye të ndryshme.”
