Ngjarja e rëndë e ndodhur një ditë më parë në sallën e gjyqit, ku u vra me armë zjarri gjyqtari Astrit Kalaja ka rikthyer në vëmendje problemet që lidhen me konfliktet për pronën dhe dështimin institucional për të garantuar sigurinë dhe drejtësinë.
Eksperti i sigurisë Fatjon Softa, ish-kreu i Gjykatës së Apelit Alaudin Malaj, avokatja Enida Bozheku dhe gazetarja Xhensila Kodra ndanë qëndrimet e tyre mbi këtë situatë në emisionin “Quo Vadis” në vizion Plus, nën moderimin e Pranvera Borakajt.
Softa tha se një vend si Shqipëria i cili aspiron të anëtarësohet së shpejti në BE nuk ka zgjidhur ende problemet me pronësinë.
Fatjon Softa: Është një situatë e vështirë. Ka mllef, akumulime. Nuk e di sa është numri i personave të vrarë vetëm për çështjet e pronave. Ky është një problem madhor në Shqipëri. Vrasja e avokatëve, gjyqtarëve kryesisht vjen për çështje pronash. Nuk po flasim për fruta, biçikleta. Po flasim për toka. Prona ka prishur familje, ka vënë hasmëri, ka shkatërruar fise. Ne po shkojmë në BE por s’kemi zgjidhur akoma problemet e pronave dhe të pronësisë.
Enida Bozheku: Nuk është vrasja zgjidhje.
Fatjon Softa: Nuk jam për këtë rrugë. Vrasja ka ndodhur për nivelin e sigurisë institucionale, vrasja mund të ndodhë në rrugë, kudo. Problem shtrohet çfarë do të bëjmë kur elementët e sigurisë duhet t’ia japim të gjitha institucioneve. Edhe qytetarët janë të kërcënuar. Shumë qytetarëve nën kërcënimin e armës u kanë marrë pronën.
Alaudin Malaj: Shqipëria duhet të ketë pakt kombëtar për drejtësinë. Është dobësuar figura e gjyqtarit./vizionplus.tv
