Si rezultat i bashkëpunimit mes Interpol Tiranës dhe autoriteteve homologe në Madrid, është lokalizuar dhe arrestuar në Spanjë me qëllim ekstradimin drejt Shqipërisë shtetasi Kevin Margjoni, 49 vjeç, i shpallur në kërkim ndërkombëtar.
Ndaj Margjonit, Gjykata e Posaçme Kundër Korrupsionit dhe Krimit të Organizuar (GjKKO) kishte caktuar masën e sigurisë “Arrest në burg” për veprat penale “Trafikimi i lëndëve narkotike”, kryer në bashkëpunim në formën e grupit të strukturuar kriminal, “Kryerja e veprave penale nga organizata kriminale ose grupi i strukturuar kriminal” si dhe “Grupi i strukturuar kriminal”.
Sipas SPAK, 49-vjeçari dyshohet si një nga personat e përfshirë në laboratorin e kokainës të zbuluar në Frakull të Fierit, një nga operacionet më të bujshme antidrogë të viteve të fundit në vend.
