Një aksident tragjik ndodhi mëngjesin e së premtes në Serres të Greqisë, ku humbën jetën një grua 43-vjeçare dhe djali i saj 21-vjeçar, me origjinë shqiptare.
Bashkëshorti i 43-vjeçares dhe babai i të riut, mes dhimbjes së madhe, deklaroi për mediat greke: Humba gruan dhe djalin tim. Po shkonin në punë. Nuk e di çfarë ndodhi, humba gjithçka.
Lexo edhe :
Related Posts
Sipas informacioneve, nëna dhe djali kishin dalë herët nga shtëpia për t’u nisur drejt vendit të punës. I riu ishte në timon, ndërsa nëna ndodhej në sediljen e pasagjerit. Rreth orës 07:30, automjeti i tyre u përplas ballë për ballë me një kamion.
Si pasojë të dy humbën jetën në vendin e ngjarjes.
Drejtuesi 56-vjeçar i kamionit deklaroi se po lëvizte normalisht në korsinë e tij me rreth 75–80 km/h, kur pa makinën që kishte humbur kontrollin dhe kishte kaluar në korsinë e kundërt. Ai tha se u përpoq të shmangte përplasjen duke devijuar majtas, por nuk arriti ta evitonte aksidentin.
Familja, me origjinë nga Shqipëria, jetonte prej vitesh në Palaiokomi. Nëna dhe djali punonin në të njëjtën kompani në zonën bregdetare të Ofrinios dhe po shkonin në punë në momentin e aksidentit.
Pas tragjedisë, bashkëshorti dhe vajza e familjes po përballen me dhimbjen e humbjes së dy njerëzve të tyre më të dashur.
Shoferi i kamionit pësoi lëndime të lehta dhe u dërgua në Spitalin e Përgjithshëm të Dramës. Autoritetet greke vijojnë hetimet për të zbardhur shkaqet dhe rrethanat e sakta të aksidentit.
