Mbrëmjen e së premtes, në ambientet e Hotel Melia në Durrës, u zhvillua koncerti i Albanian Youth Chamber Ensemble, nën drejtimin e violinistit dhe dirigjentit të njohur Maestro Shlomo Mintz, me pjesëmarrjen e muzikantëve të rinj nga Shqipëria dhe Kosova.
Koncerti u mbajt në kuadër të edicionit të 21-të të Festivalit Ndërkombëtar të Muzikës së Dhomës dhe solli një interpretim të veçantë të koncerteve të Antonio Vivaldit për dy, tre dhe katër violina.
Maestro Shlomo Mintz vlerësoi angazhimin e të rinjve, duke theksuar se rruga drejt suksesit kërkon punë të vazhdueshme.
“Kam punuar për disa ditë me këta të rinj dhe ky është viti i dytë që vij në këtë festival në Durrës. Të rinjtë e kësaj orkestre duhet të punojnë më shumë dhe të bëjnë një analizë të vetes dhe të punës së tyre, që të ecin të sigurt përpara. Festivalin e shoh më shumë si një angazhim vullnetar të pak njerëzve dhe besoj se ai meriton më shumë mbështetje”, tha Shlomo Mintz, dirigjent dhe violinist.
Pjesëmarrja në këtë projekt u vlerësua edhe nga muzikantët e rinj, të cilët e cilësuan eksperiencën me Maestron si një mundësi të vyer për zhvillimin e tyre artistik.
“Ishte një nga kënaqësitë më të mëdha që të bashkëpunonim me një nga figurat më të mëdha të muzikës klasike dhe violine”, tha Elucidate Mema, violinist.
“Ishte një knaqësi shumë e madhe dhe eksperiencë shumë e bukur. Morëm dije të reja dhe një qasje të re ndaj muzikës”, u shpreh Ilza Reka, violiniste
Në përfundim të koncertit, organizatorët shpërndanë edhe certifikata vlerësimi për të gjithë orkestrantët e rinj, duke vlerësuar kontributin dhe pjesëmarrjen e tyre në këtë aktivitet artistik.
/vizionplus.tv
