Pushimet mbaruan për demokratët dhe lideri historik Sali Berisha nisi sot sezonin e ri politik, duke vendosur si detyrë kryesore modernizimin e Partisë Demokratike.
Berisha pranoi se organizimi i PD-së ka jo pak defekte, duke paraqitur një raport që Instituti Republikan Amerikan ka bërë për mënyrën se si funksionon Partia Demokratike. Berisha vendosi të lexojë publikisht raportin për të theksuar se cilat janë problemet e PD-së sot.
“Partia Demokratike nuk përballet me një krizë idesh, lidershipi apo rëndësie politike. Ajo përballet me mungesën e një sistemi të brendshëm koherent, të aftë për të përkthyer qëllimin politik në veprim organizativ të koordinuar.”
Në këtë situatë, PD-ja ka vendosur të dixhitalizojë komunikimin me anëtarët e saj, duke krijuar një aplikacion të posaçëm. Aplikacioni do të shpërndajë mesazhin politik te të gjithë anëtarët, por edhe do të masë punën e secilit prej tyre.
“Kjo platformë duhet të kuptohet si mekanizmi që integron strukturën e partisë në një sistem funksional. Ajo do të centralizojë komunikimin, do të standardizojë proceset dhe do të ofrojë gjurmimin e aktiviteteve në të gjithë organizatën”, tha Berisha.
Sërish, Sali Berisha u kërkoi drejtuesve të PD-së të shfrytëzojnë platformat për të përcjellë mesazhin politik.
“Po zotëri, nuk mund të thuash: ç’më duhet mua TikToku. Nuk mund të dalësh jashtë TikTokut, se kemi 40% të elektoratit që sheh vetëm TikTokun dhe merr lajmet nga TikToku. Është një gjeneratë”, deklaroi Berisha.
Tetë muaj larg zgjedhjeve lokale, Partia Demokratike ka vendosur të ndryshojë mënyrën e organizimit, përpara se të përballet me socialistët e drejtuar nga Edi Rama në betejën për bashkitë e vendit.
