Lugina e Shkopetit mbetet padyshim ndër zonat më të bukura natyrore të të gjithë Qarkut Dibër. Me liqenin që e përshkon përmes, kjo luginë po tërheq me dhjetëra vizitor çdo ditë.
Turist vendas dhe të huaj ndalen në këtë luginë në pikat më të bukura, ku më e vizituara mbetet ura tip pasarel që lidh fshatin Madhesh me rrugën nacionale Burrel -Milot.
Daniel dhe Livia janë një çift të rinjsh që vijnë nga Gjermania. Ata thonë se e kanë zbuluar vendin nga TikTok.
“Është dita jonë e dytë. Jemi të lumtur që jemi këtu. Kemi dëgjuar për Shkopetin në TikTok. Është shumë e bukur natyra dhe malet jane vërtetë mbresëlënëse. Gjithashtu edhe njerëzit janë shumë miqësorë”, tha Danieli.
“Është shumë bukur. Nuk e dija që Shqipëria ka natyrë kaq të bukur, dhe në fakt nuk dija asgjë më parë për Shqipërinë, nuk e kisha menduar as ta vizitoja. Kjo është dita jonë e dytë dhe deri më tani ura është gjëja më e bukur që kemi parë. Mund të bëjmë shumë gjëra të ndryshme si të vizitojmë qytetet e mëdha, ngjitje mali, të shohim natyrën etj”, tha Livia.
Ndërsa Gabriela vjen nga Republika Çeke. Ajo jeton prej një viti në Shqipëri, dhe thotë se është hera e disatë që viziton Shkopetin.
“Unë vij nga Çekia, por aktualisht po jetojmë këtu në Shqipëri për gati një vit. E shijojmë kohën këtu. Është vend shumë i bukur dhe kam rënë në dashuri me Shqipërinë. Është hera e 5 apo 7 që vizitojmë Shkopetin. Na pëlqen shumë kjo ura. Këtu afër ndodhet dhe një restorant i vogël ku marrim me qera kajak të vegjël, na shijon shumë. Unë jetoj këtu me vajzën time dhe tani jam më shoqërinë. Shqipëria po rritet shumë dhe kam shpresa se do të bëhet më e mira në Ballkan. Ju keni gjithçka, detin e bukur, malet e bukura, njërëzit janë të mirë, është e këndshme të jetosh këtu”, u shpreh Gabriela.
Shkopetin nuk e vizitojnë vetëm të huajt por edhe shqiptarët e Kosovës.
Lugina e Shkopetit është vetëm pak kilometra larg rrugës së Kombit dhe qytetit të Burrelit, por aktualisht mungojnë hapësirat e mjaftueshme akomoduese, duke bërë që vizitorët të qëndrojnë vetëm për pak orë.
/vizionplus.tv
