Kryeministri Edi Rama ka reaguar në rrjetet sociale lidhur për lajmin se Banjot Termale të Bënjës janë shkatërruar dhe zona është betonizuar.
Rama i cilësoi këto raportime si “lajme të manipuluara”, duke përdorur, sipas tij, të njëjtën metodë që është përdorur edhe në raste të tjera të ngjashme në rrjetet sociale. Ai foli për një “shpërthim digjital” të nxitur që ka për qëllim të krijojë alarm publik dhe reagime të forta emocionale.
Sipas kryeministrit, pretendimet për betonizim apo dëmtim të zonës nuk qëndrojnë. Ai deklaroi se në terren nuk ka shkatërrim të natyrës apo ndërhyrje të paligjshme, por një projekt publik rigjenerimi në funksion të përmirësimit të zonës turistike.
Rama u shpreh se në Banjot Termale të Bënjës nuk ka “flamingo, shitblerje apo konflikte pronësie”, por vetëm investime që, sipas tij, synojnë të rrisin numrin e vizitorëve dhe turizmin në zonë.
Rama: Prej 24 orësh është lëshuar një tjetër “raketë” digjitale, që algoritmi e ka shpërthyer në qindra mijëra lajke e mallkime, për shkatërrimin, betonizimin dhe tharjen e Banjove Termale të Bënjës.
Me të njëjtën metodë dhe me “ndihmën” e të njëjtave duar të huaja, që i dhanë algoritmit “dopingun” për një turravrap të paparë në përhapjen e alarmit për flamingot, organizatorët e kësaj trazire që synon të rrëzojë qeverinë e të kthejë mbrapa Shqipërinë, duke manipuluar njerëzit që kanë shqetësime të sinqerta, kërkojnë ta kthejnë Bënjën në një casus belli të ri.
Kush do të vërtetën e ka në këtë video, SOT, nga Banjot e Bënjës, ku s’ka flamingo, s’ka shitblerje, s’ka pronarë e as konflikte pronësie, po ka thjesht një projekt publik rigjenerimi e Rilindjeje Urbane, në funksion të mijëra e mijëra vizitorëve e turistëve që shkojnë aty çdo vit.
