Një shtetas italian dhe një shtetas shqiptar janë arrestuar nga policia italiane pasi u kapën me lëndë narkotike dhe para Cash, të dyshuara si të përfituara nga trafiku i drogës.
Oficerët e policisë ndoqën makinën me të cilën udhëtonin dy burrat, një shqiptar 44-vjeçar dhe një italian 50-vjeçar, të dy tme precedent penalë për vepra penale që lidhen me lëndët narkotike.
Gjatë kontrollit në automjet, policia gjeti një qese me rreth 10.8 gramë marijuanë të fshehur në një paketë cigareje. Po ashtu, 50-vjeçari kishte me vete edhe rreth 2 gramë marijuanë, ndërsa 44-vjeçarit iu gjetën 310 euro.
Kontrollet vijuan më tej në automjet, ku në ndarjen e motorit u zbulua një tjetër paketë cigareje me rreth 14 gramë marijuanë dhe disa doza kokaine, me peshë totale rreth 5 gramë.
Hetimet u shtrinë edhe në banesën e përdorur nga 50-vjeçari, ku policia sekuestroi 824 gramë marijuanë dhe një peshore precize. Në një kasafortë u gjetën gjithashtu 66 gramë marijuanë të tjera, 39 gramë kokainë, 40 gramë hashash dhe 915 euro cash.
Në përfundim të operacionit, të dy të dyshuarit u arrestuan nën akuzën e posedimit të lëndëve narkotike me qëllim shpërndarjeje.
