Qeveria miratoi këtë të premte një sërë vendimesh që prekin administratën publike, pensionistët, arsimin dhe procesin e integrimit europian. Në përfundim të mbledhjes së Këshillit të Ministrave, ministrja e Financave, Delina Ibrahimaj, bëri të ditura vendimet e reja të miratuara.
Sipas saj, ekzekutivi ka miratuar kuotat për rreth 300 kredi të buta me normë interesi zero, të destinuara për punonjësit e administratës publike. Nga 70 kuota do të përfitojnë punonjësit e Policisë së Shtetit, Policisë së Burgjeve, mësuesit, mjekët dhe ushtarakët.
“Morëm vendim për administratën publike, miratuam kuotat e rreth 300 kredive të buta me normë interesi zero. Policia e Shtetit, ajo e burgjeve, arsimtarëve, mjekëve dhe ushtarakëve, që do të kenë nga 70 kuota. Miratuam dy ligje që vlejnë për rrugëtimin në BE.
Kemi miratuar projektligjin për emëtuesit e titujve, i përafruar me direktivat europiane. Me Ministrinë e Arsimit kemi miratuar një projektvendim për rritjen e masave të bursave për shkollat profesionale si dhe për ushqimin në shkolla”, u shpreh Ministrja.
Një tjetër vendim i rëndësishëm lidhet me pensionet. Ministrja Ibrahimaj njoftoi se nga data 1 korrik pensionet do të indeksohen me 2.7%, duke përfshirë pensionet e pleqërisë dhe pensionet e veçanta.
Sipas saj, nga kjo masë do të përfitojnë rreth 900 mijë pensionistë, të cilët do ta marrin rritjen duke nisur nga muaji korrik.
“Do të indeksojmë pensionet me 2.7 përqind, të veçantët dhe të pleqërisë, janë 900 mijë përfitues gjithsej që nga data 1 korrik do të kenë mundësi të marrin këtë rritje”, u shpreh ministrja.
