Komiteti Ekzekutiv i Uefa-s, sikurse edhe pritej ka votuar unanimisht për kalendarin dhe formulën e re të Uefa Champions Leeague dhe Europa League.
Champions League do të luhet me sistem grumbullimi në Lisbonë nëpërmjet një formule final-tetë nga data 12 deri me 23 gusht në dy stadiume të kryeqytetit portugez “Da Luz” dhe “Jose Alvalade”.
Vendimi përcakton zhvillimin e takimeve teke dhe pa tifozë, një formulë e pazakontë në historinë e këtij kompeticioni.
Paraprakisht do të duhet të luhen në datat 7 dhe 8 gusht katër ndeshjet e kthimit të 1/8 për të kompletuar kuadrin e ekipeve çerekfinaliste.
Sfidat që do të luhen janë: Juventus-Lyon, Barcelona-Napoli, Manchester City-Real Madrid, Bayern Munchen-Chelsea.
Më pas të teta ekipet e kualifikuara për në çerekfinale do të grumbullohen në Lisbonë.
Pas shortit, përballjet teke do të luhen në datat 12, 13, 14 dhe 15 gusht. Më tej po në kryeqytetin portugez, gjithnjë me ndeshje teke, do të luhen edhe dy gjysmëfinalet në datat 18 dhe 19 gusht. Finalja e madhe e Champions League do të zhvillohet në stadiumin “Da Luz” të dielën me 23 gusht. Në këtë impiant është luajtur edhe finalja e Champions në 2014.
Të 11 përballjet e mbetura në muajin gusht do të transmetohen ekskluzivisht në Tring dhe Vizion Plus.
Uefa ka spostuar Stambollin si qytet pritës i finales së Champions League në 2021 e rrjedhimisht Sain Petersburg në Rusi si organizator i finales në 2022.
Po ashtu Komiteti Ekzekutiv konfirmoi zhvillimin e ndeshjeve të Uefa Europa League në katërf stadiume të Gjermanisë, gjithashtu në muajin gusht e po me të njëjtën formule, një “Final Eight” me një ndeshje për cift deri në finale.
Në përfundim të mbledhjes së komitetit ekzekutiv, ku është anëtar edhe Armand Duka, do të detajohen edhe datat konkrete për ciftet e ndeshjeve të Champions dhe Europa League.
