Një histori prekëse ka ardhur nga Australia, ku 82-vjeçari Bob Montgomery humbi jetën vetëm një ditë pasi përfundoi një udhëtim prej 5 300 kilometrash me biçikletë, të zhvilluar për mbledhjen e fondeve kundër sëmundjes së neuronit motorik (MND).
Montgomery nisi sfidën e tij nga Broome, në Australinë Perëndimore, dhe pas gjashtë javësh mbërriti në Bowral, pranë Sidneit. Udhëtimin e quajti “One Last Ride” (Një udhëtim i fundit) dhe e realizoi së bashku me nipin e tij 18-vjeçar, Tom Malcolm.
Gjatë kësaj nisme, gjyshi dhe nipi arritën të mbledhin më shumë se 105 mijë dollarë australianë për organizatën MND NSW, e cila mbështet pacientët që vuajnë nga sëmundja e neuronit motorik. Kjo ishte fushata e gjashtë bamirëse me biçikletë e Montgomeryt për të njëjtin qëllim, ndërsa në total ai kishte mbledhur rreth 300 mijë dollarë australianë.
Familja e tij njoftoi se vdekja ishte e papritur. Bashkëshortja e tij, Jenny, me të cilën kishte kaluar 59 vite martesë, qëndroi pranë tij deri në momentet e fundit. Montgomery kishte nisur këto iniciativa pasi kishte humbur një kushëri nga kjo sëmundje dhe dëshironte të rriste ndërgjegjësimin për të.
Vetëm disa orë para vdekjes, ai mori pjesë në festimet për përfundimin e udhëtimit dhe vazhdonte të fliste me pasion për misionin e tij. Pas përfundimit të sfidës në Bowral, nipi i tij vazhdoi drejt Sidneit, ku familja u mblodh për të festuar suksesin e tyre, por pak më vonë 82-vjeçari pësoi një problem të papritur shëndetësor dhe ndërroi jetë.
Drejtuesi i organizatës MND NSW, Liam O’Meara, shprehu trishtimin për humbjen e Montgomeryt, duke e cilësuar atë si një mik të çmuar dhe një mbështetës të palodhur të kauzës për pacientët me sëmundjen e neuronit motorik.
/vizionplus.tv
