Një 60-vjeçar në Uells është dënuar me 2 vjet e 4 muaj burg, pasi mbajti trupin e pajetë të nënës së tij në një frigorifer për gati tre vite, me qëllim që të vazhdonte të përfitonte pensionin dhe ndihmat sociale të saj, në vlerë mbi 91 mijë euro.
Sipas mediave britanike, Christopher Phillips u shpall fajtor pasi pranoi akuzat për pengimin e varrimit të ligjshëm të nënës së tij, si edhe për dy raste mashtrimi ndaj shtetit britanik.
Hetimet zbuluan se nëna e tij, 89-vjeçarja Sylvia Phillips, kishte ndërruar jetë më 8 mars 2023, në rrethana që ende nuk janë sqaruar plotësisht.
Dy ditë pas vdekjes së saj, i biri bleu një frigorifer të madh dhe futi brenda trupin e saj.
Trupi ishte mbuluar me një batanije.
Gjatë kësaj periudhe, Phillips nuk njoftoi autoritetet për vdekjen e së ëmës. Si pasojë, pensioni shtetëror, ndihmat për kujdesin, subvencionet për koston e jetesës, ndihma për ngrohjen dhe përfitime të tjera vazhduan të depozitoheshin në llogarinë bankare të saj.
Në total, ai përfitoi në mënyrë të paligjshme 78.190 paund (rreth 91 mijë euro), duke përdorur llogaritë bankare të nënës.
60-vjeçari kishte mashtruar vazhdimisht edhe mjekët, duke pretenduar se nëna e tij nuk dëshironte të paraqitej në kontrolle apo vizita mjekësore, ndërsa vazhdonte të merrte edhe medikamentet e përshkruara në emrin e saj.
Avokatja deklaroi se Phillips vuante nga probleme të shëndetit mendor. Ai u kishte thënë hetuesve se “nuk donte ta linte të ikte”, ndërsa rrëfeu se vazhdonte të ulej pranë trupit të saj, t’i mbante dorën dhe t’i fliste sikur të ishte ende gjallë.
Rasti u zbulua në shkurt të vitit 2026, pasi mjeku i familjes ngriti dyshime për mungesën e gjatë të 89-vjeçares.
Kur policia shkoi në banesë, Phillips fillimisht pretendoi se nëna e tij ndodhej në Londër te disa të afërm, por nuk arriti të jepte asnjë detaj. Gjatë kontrollit, efektivët gjetën trupin e saj në frigorifer dhe arrestuan 60-vjeçarin.
