Ajo që duhej të ishte kulmi i festimeve për 40-vjetorin e martesës u shndërrua në një përvojë të tmerrshme për një çift amerikan, pasi burri u sulmua nga një peshkaqen gjatë një zhytjeje në ujërat e Bahamasit.
John Schweizer, 69 vjeç, nga shteti i Connecticut, po notonte me maskë pranë ishullit Bimini, së bashku me bashkëshorten e tij Marcy dhe dy djemtë e rritur, kur një peshkaqen i gumës së Karaibeve e sulmoi papritur.
69-vjeçari tregoi se peshkaqeni u shfaq papritur dhe e kafshoi në këmbë, teksa gjithçka ndodhi brenda një fraksioni sekonde. Peshkaqeni e kapi fort në këmbën e majtë dhe e tërhoqi për pak çaste nën ujë, përpara se ta lëshonte. Djali i tij, Tom, pa i tronditur gjithë skenën. Ai tha se plagët ishin aq të rënda, sa në pjesën e poshtme të këmbës dukej edhe kocka.
Pas sulmit, ekuipazhi i anijes nxori menjëherë të gjithë turistët nga uji dhe u nis me shpejtësi drejt anijes së kroçerës. Udhëtimi, që zakonisht zgjat rreth 45 minuta, u përshkua në vetëm 10 minuta. Në anijen turistike, një mjek i dha ndihmën e parë dhe kaloi rreth tre orë duke i qepur plagët. Në total, burri mori 26 qepje në këmbë. Ai kishte edhe dëmtime në njërën dorë, të cilat dyshohet se janë shkaktuar nga dhëmbët ose pendëza e peshkaqenit. Më pas ai u transportua në një spital në Miami, ku u mbajt vetëm një ditë nën kujdes mjekësor. Aktualisht ndodhet në shtëpi dhe po rikuperohet, ndërsa ka rifilluar të ecë.
Pavarësisht përjetimit të frikshëm, Schweizer tha se ndihej me fat që peshkaqeni sulmoi atë dhe jo bashkëshorten apo djemtë. Megjithatë, kur u pyet nëse do të notonte sërish me peshkaqenë, përgjigjja ishte e menjëhershme “jo”.
Sipas të dhënave të fundit të platformave ndërkombëtare që monitorojnë sulmet e peshkaqenëve, deri në fund të korrikut 2026 janë regjistruar 32 sulme të konfirmuara në mbarë botën, një shifër më e ulët krahasuar me 65 rastet e regjistruara gjatë vitit 2025.
/vizionplus.tv
