Një incident i rëndë në një kopsht në Merseyside të Anglisë ka ngritur shqetësime për sigurinë e fëmijëve, pasi një vajzë 2-vjeçare iu dorëzua gabimisht gjyshit të një fëmije tjetër, i cili u largua me makinë për rreth 10 minuta para se të kuptonte gabimin dhe ta kthente në kopsht.
Ngjarja ndodhi më 10 qershor në kopshtin Kids Planet Crosby. Nëna e vajzës, Jody Riley, tha se u njoftua me telefon nga stafi se vajza e saj, Rosie, ishte marrë gabimisht nga një person tjetër. Pas incidentit, ajo vendosi të mos e dërgonte më të bijën në këtë institucion dhe të kujdesej vetë për të.
Pas vetëraportimit të rastit nga kopshti, autoriteti britanik për inspektimin e arsimit, Ofsted, zhvilloi një kontroll të jashtëzakonshëm. Raporti i publikuar zbuloi se procedurat e sigurisë nuk zbatoheshin në mënyrë të qëndrueshme dhe se mangësitë në mbikëqyrjen e stafit dhe procedurat e marrjes së fëmijëve i ekspozonin ata ndaj rreziqeve serioze.
Inspektorët konstatuan gjithashtu se privatësia e fëmijëve nuk respektohej gjithmonë gjatë kujdesit personal dhe se drejtuesit e institucionit nuk kishin krijuar një kulturë të mjaftueshme për garantimin e sigurisë. Megjithatë, raporti vlerëson se stafi kishte marrëdhënie të ngrohta me fëmijët dhe kujdesej për nevojat e tyre të përditshme.
Për shkak të shkeljeve të konstatuara, Ofsted njoftoi se do të ndërmarrë masa ndaj kopshtit, duke i kërkuar zbatimin e një plani me katër pika për përmirësimin e standardeve të sigurisë. Ndërkohë, drejtuesit e Kids Planet kërkuan ndjesë për incidentin, duke e cilësuar atë si një gabim të izoluar njerëzor, dhe thanë se kanë forcuar procedurat e marrjes së fëmijëve, sigurinë, trajnimin e stafit dhe vlerësimin e rreziqeve për të shmangur përsëritjen e rasteve të ngjashme.
/vizionplus.tv
