Shumë prej zakoneve që kemi në kuzhinë duken të padëmshme, por sipas ekspertëve të sigurisë ushqimore, disa prej tyre mund të rrisin ndjeshëm rrezikun e helmimit nga ushqimi.
Çdo vit miliona njerëz preken nga sëmundjet e shkaktuara nga ushqimet e kontaminuara dhe, sipas specialistëve, një pjesë e mirë e rasteve lidhen me gabimet që bëhen në kuzhinat e shtëpisë.
Ja cilat janë gabimet më të zakonshme që duhen shmangur.
Shkrirja e mishit në banak
Një nga gabimet më të shpeshta është lënia e mishit apo pulës të shkrijë në temperaturën e ambientit. Ekspertët paralajmërojnë se pjesa e jashtme e mishit ngrohet shumë më shpejt se pjesa e brendshme, duke krijuar kushtet ideale për shumimin e baktereve. Për këtë arsye rekomandohet që ushqimet e ngrira të shkrihen në frigorifer ose me metoda të sigurta, dhe jo mbi banakun e kuzhinës.
Konsumimi i ushqimit që ka qëndruar jashtë frigoriferit për më shumë se 2 orë
Një copë picë e lënë në tavolinë gjatë natës mund të duket ende e mirë për t’u ngrënë, por ekspertët nuk e këshillojnë. Ushqimet që qëndrojnë më shumë se dy orë në temperaturën e dhomës mund të bëhen vatër bakteresh, edhe nëse nuk kanë ndryshuar pamjen apo aromën. Në ditët shumë të nxehta, ky afat zbret në vetëm një orë.
Larja e pulës së pagatuar
Shumë njerëz e lajnë pulën para gatimit duke menduar se kështu e pastrojnë. Në fakt, sipas specialistëve, larja nuk eliminon bakteret. Përkundrazi, spërkat ujin në lavaman dhe sipërfaqet përreth, duke përhapur mikroorganizma si salmonela. Bakteret shkatërrohen vetëm gjatë gatimit në temperaturën e duhur.
Kullimi i ushqimit mbi një lavaman të papastër
Edhe nëse makaronat apo orizi janë gatuar siç duhet, ato mund të kontaminohen nëse kullohen mbi një lavaman me enë të palara ose mbetje ushqimore. Ekspertët këshillojnë që lavamani të pastrohet rregullisht dhe kulluesja të mos vendoset mbi enë të ndotura, pasi bakteret mund të përhapen përmes spërkatjeve të ujit.
Përdorimi i të njëjtës dërrasë prerëse
Prerja e sallatës në të njëjtën dërrasë ku pak më parë është përgatitur mish i gjallë është një nga mënyrat më të zakonshme të kontaminimit të ushqimit. Specialistët rekomandojnë përdorimin e dërrasave të ndryshme për mishin dhe perimet ose larjen e tyre me ujë të nxehtë dhe detergjent pas çdo përdorimi.
Lejimi i kafshëve shtëpiake mbi banakun e kuzhinës
Për shumë familje kjo është diçka normale, por veterinerët dhe ekspertët e higjienës paralajmërojnë se putrat e maceve mund të bartin baktere dhe parazitë, sidomos nëse kafsha del jashtë ose përdor kutinë e rërës. Për këtë arsye këshillohet që kafshët shtëpiake të mos lejohen mbi sipërfaqet ku përgatitet ushqimi dhe banaku të pastrohet para gatimit.
/vizionplus.tv
