Një 21-vjeçar është arrestuar në flagrancë nga Policia e Tiranës, pasi u kap duke shpërndarë lëndë narkotike në doza. I riu tentoi të fshihte provat dhe më pas të largohej, por u neutralizua menjëherë nga forcat e rendit.
Shërbimet e Forcës së Posaçme “Shqiponja”, në bashkëpunim me specialistët e Seksionit për Hetimin e Narkotikëve në DVP Tiranë, në bazë të informacioneve të siguruara në rrugë operative, organizuan një operacion të menjëhershëm për identifikimin dhe kapjen e një shtetasi të dyshuar për shpërndarje narkotikësh.
Si rezultat, u arrestua në flagrancë shtetasi K. K., 21 vjeç, banues në Tiranë. Ai u konstatua nga policia në rrugën “Albanopoli”, ku hodhi në tokë dozat e kanabisit dhe tentoi të fshihej në një ambient që përdorte si bilardo.
Gjatë kontrollit në këtë ambient, u sekuestruan sasi të lëndës narkotike cannabis sativa, të ndarë në doza gati për shitje, një peshore, tre aparate celularë dhe një shumë parash, e dyshuar si e përfituar nga aktiviteti kriminal.
Materialet procedurale u referuan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
Policia e Tiranës thekson se operacionet për goditjen e shpërndarësve të drogës do të vijojnë pa ndërprerje.
/vizionplus.tv
