Të paktën 11 persona kanë humbur jetën dhe 19 të tjerë janë plagosur pas një zjarri të fuqishëm që përfshiu një institucion kujdesi për fëmijë në periferi të Algjerit, bëjnë të ditur autoritetet algjeriane.
Zjarri shpërtheu gjatë natës në një qendër sociale për fëmijë në komunën Mohamadia. Shërbimet e emergjencës mbërritën në vendngjarje rreth orës 03:00 dhe nisën operacionet për shuarjen e flakëve dhe shpëtimin e personave brenda objektit.
Deri më tani nuk janë bërë të ditura shkaqet e zjarrit, ndërsa autoritetet nuk kanë specifikuar as moshën e viktimave dhe as nëse mes tyre ka fëmijë. Hetimet për zbardhjen e rrethanave të ngjarjes vijojnë.
🚨⚫🇩🇿 Drame en Algérie : 11 morts et 19 blessés dans l’incendie d’un foyer pour orphelins (Bilan provisoire)
Les services de la Protection civile ont annoncé ce jeudi un bilan provisoire de 11 morts et 19 blessés après l’incendie d’un établissement pour l’enfance assistée situé… pic.twitter.com/8vwjgpDwXG
— LeLien (@LeLienofficiel) July 16, 2026
Kryeministri algjerian, Sifi Ghrieb, vizitoi disa prej të plagosurve në spitalet e Zeralda-s dhe Mustafa Basha-s në kryeqytet, ndërsa autoritetet vijojnë të monitorojnë situatën.
Ngjarja ndodh në një periudhë kur Algjeria po përballet me një valë të fortë të nxehti dhe me një numër të madh zjarresh. Sipas shërbimeve të mbrojtjes civile, nga data 8 deri më 15 korrik janë regjistruar 932 vatra zjarri, prej të cilave 913 janë shuar.
Për përballimin e situatës janë angazhuar mbi 19 mijë efektivë, qindra mjete zjarrfikëse, si dhe mjete ajrore për ndërhyrje. Autoritetet algjeriane kanë deklaruar se disa prej zjarreve mund të jenë shkaktuar nga zjarrvënie e qëllimshme dhe hetimet për identifikimin e autorëve vijojnë.
