Ministrja serbe për Administratë Publike dhe Vetëqeverisje Lokale, Snezhana Paunoviç, shkaktoi reagime të forta pasi deklaroi se, po të kishte qenë në vend të Slobodan Miloševićit në vitin 1998, “do ta kishte spastruar etnikisht Kosovën”.
Pas kritikave, ajo tha se nuk kishte nënkuptuar vrasjen e shqiptarëve, por se ata që nuk e ndienin veten pjesë të Serbisë duhej të largoheshin drejt “shtetit të tyre amë”.
Kreu i Partisë Demokratike, Sali Berisha, në një konferencë për mediat ditën e sotme kërkoi që Paunović të shpallet “non grata” në Shqipëri dhe të ndiqet penalisht për mbështetje të gjenocidit dhe spastrimit etnik.
“Ne kërkuam shpalljen e saj ‘non grata’ dhe inicimin e një padie për mbështetje të gjenocidit dhe spastrimit etnik nga një ministre e vendit që i ka kryer këto akte. Unë ju garantoj dy gjëra. Për sa kohë ajo rri në atë kabinet, ajo ka shprehur mendimin e padronit të Edi Ramës, Aleksandër Vuçiçit. Të mbash një monstër si ajo në kabinet do të thotë të kesh vetë atë mendësi”, u shpreh Berisha.
Ai akuzoi gjithashtu qeverisë shqiptare se nuk ka reaguar lidhur me rastin.
“Dënoj me forcën më të madhe heshtjen e turpshme, heshtjen prej vasali të qeverisë shqiptare ndaj deklaratës së një ministreje të Beogradit. Ndërkohë që shpall ‘non grata’ qytetarë të Prizrenit pse marrin pjesë në protesta, shpall ‘non grata’ deputetë të Maqedonisë së Veriut, përfaqësues të shqiptarëve, në aktin më të turpshëm nuk guxon të shpallë ‘non grata’ atë ministre që kërkonte spastrimin etnik të të gjithë shqiptarëve nga Kosova”, deklaroi Berisha.
Një ditë më parë, Ministri në detyrë i Punëve të Brendshme të Kosovës, Xhelal Sveçla, njoftoi shpalljen “non grata” të Snezhana Paunoviç.
Deklaratat e saj u dënuan edhe nga Bashkimi Europian.
Zëdhënësja e Komisionit Evropian, Anitta Hiper, theksoi se në Evropë nuk ka vend për retorikë që justifikon apo promovon spastrimin etnik.
“Deklarata të tilla bien ndesh me vlerat e dinjitetit njerëzor, pajtimit, llogaridhënies dhe marrëdhënieve të mira fqinjësore, mbi të cilat është ndërtuar Bashkimi Europian”, tha ajo.
Edhe komisionerja për Zgjerim e BE-së, Marta Kos, u shpreh e tronditur nga deklaratat e ministres serbe, duke theksuar se shpreson që ato të jenë qëndrim personal dhe jo politikë zyrtare e Qeverisë së Serbisë.
“Nuk mund të ketë asnjë tolerancë për deklarata të tilla. Në Evropë nuk ka vend për retorikë që justifikon, promovon apo madhëron spastrimin etnik”, deklaroi Kos.
