Forcat e Policisë në Sarandë kanë vënë në pranga 31-vjeçarin Kejdi Banaj, i cili është arrestuar në flagrancë duke transportuar armë zjarri.
Kapja e tij u bë e mundur në tunelin e Skarficës, aty ku Banajt iu gjetën 4 pistoleta, të cilat sipas hetimeve, dyshohet se do të shiteshin tek një grup kriminal në Sarandë.
Shërbimet e Policisë kishin mbajtur në vëzhgim automjetin që drejtonte 31-vjeçari dhe në tunel kryen ndalimin e tij.
Kejdi Banaj i kishte fshehur armët në dyshemenë e automjetit me të cilin po udhëtonte. Dyshohet se armët ishin futur kontrabandë në Shqipëri të ndara në pjesë dhe më pas ishte bërë montimi i tyre. Hetimi vijon për të zbuluar persona të tjerë të përfshirë në trafik.
Ndërkohë, në Shkodër, një 21-vjeçar, Roberto Malocaj, u arrestua nga Policia. Gjatë kontrollit në banesën e tij, në fshatin Trush, u gjet një sasi e konsiderueshme municioni dhe 4 armë zjarri, konkretisht një automatik, një pushkë dhe dy armë gjahu.
Armët dhe municionet u sekuestruan në cilësinë e provës materiale, ndërsa do ti nënshtrohen edhe ekspertizës balistike
