Ministri i Bujqësisë, Andis Salla, ka prezantuar në Kuvend projektligjin për dëftesat tregtare mbi produktet bujqësore, një nismë që sipas tij synon të krijojë instrumente të reja financimi dhe të modernizojë sektorin e bujqësisë.
Salla u shpreh se ligji do t’u vijë në ndihmë fermerëve duke u mundësuar përdorimin e produktit bujqësor si garanci për financim, si për prodhimet në proces, ashtu edhe për ato të magazinuara. Sipas tij, kjo do të forcojë marrëdhëniet mes fermerëve, bizneseve agro-ushqimore dhe institucioneve financiare.
Ministri theksoi se dëftesat tregtare do të regjistrohen në një sistem elektronik të posaçëm përmes portalit e-Albania, duke garantuar më shumë transparencë dhe siguri juridike. Ai tha se mekanizmi i ri synon të formalizojë praktikat ekzistuese dhe të krijojë më shumë besim në tregun bujqësor.
“Ky projektligj synon të krijojë një instrument modern financiar në shërbim të zhvillimit të bujqësisë shqiptare, duke forcuar marrëdhëniet ndërmjet fermerëve, operatorëve ekonomikë dhe institucioneve financiare“, u shpreh Salla në Kuvend.
Ai shtoi se fermeri investon përpara se të sigurojë të ardhurat nga prodhimi dhe se pikërisht në këtë periudhë lind nevoja më e madhe për mbështetje financiare. “Për herë të parë krijohet mundësia që vetë produkti bujqësor të fitojë vlerë ekonomike përpara se të shitet në treg”, deklaroi ministri.
Salla nënvizoi se projektligji është në përputhje me praktikat e Bashkimit Evropian, ku zhvillimi i bujqësisë nuk mbështetet vetëm te subvencionet, por edhe te instrumentet financiare që nxisin investimet dhe lehtësojnë aksesin në financim për fermerët.
/vizionplus.tv
