Deputeti i Lëvizjes Bashkë, Redi Muçi, kërkoi shpjegime nga qeveria shqiptare se përse ministrja serbe nuk është shpallur “non grata” në Shqipëri, ashtu siç ka vepruar Kosova.
Sipas Muçit, deklarata e Paunoviqit dhe mbështetja e dhënë nga zv/kryeministri serb kërkonin një reagim më të fortë nga autoritetet shqiptare. Ai akuzoi qeverinë dhe kryeministrin Edi Rama për mungesë qëndrimi ndaj çështjeve kombëtare.
“Çfarë pret qeveria shqiptare dhe kryeministri për të reaguar ndaj deklaratës së ministres serbe Paunoviç për spastrimin etnik të Kosovës? Kosova e ka shpallur non grata ministren“, deklaroi Muçi në Kuvend.
Përgjigjja erdhi nga kreu i grupit parlamentar të Partisë Socialiste, Taulant Balla, i cili tha se reagimi i qeverisë shqiptare ka qenë i menjëhershëm dhe në nivelin e duhur.
Balla e cilësoi deklaratën e ministres serbe si “të papërgjegjshme dhe indinjuese”, ndërsa theksoi se çështjet kombëtare nuk duhet të përdoren për debate politike.
Sipas Ballës, qëndrimi i Shqipërisë është shprehur përmes Ministrisë së Jashtme dhe përfaqësuesve politikë, duke shtuar se qeveria shqiptare “nuk tallet me çështjet kombëtare”.
Gjatë replikës, Balla mbrojti edhe qëndrimin e kryeministrit Edi Rama ndaj Kosovës, duke deklaruar se ai ka qenë një nga kryeministrat shqiptarë që ka ngritur në mënyrë të vazhdueshme çështjet që lidhen me Kosovën.
“Sa i përket një deklarate jo vetëm të papërgjegjshme, por indinjuese dhe të rëndë, reagimi i qeverisë shqiptare ka qenë në kohë, adekuat nga Ministria e Jashtme. Këto janë çështje që nuk adresohen me karagjozllëk diletantësh politikë, të një kadeti të ri në Kuvend. Nuk tallemi me çështjet kombëtare, s’jemi karagjozë si puna jote! Qëndrimin e kemi mbajtur në nivelin e qeverisë nga ministri i Jashtëm, në nivel politik, kam reaguar përpara teje, ti ishe në gjumë kur kam reaguar unë bashkë me ata që ke në kafazin tënd politik. Ky akt është dënuar nga autoritetet politike përfaqësuese. Sa i përket Edi Ramës, ti dhe shokët e tu duhet të lani gojën mirë se është i vetmi kryeministër që nga 1912 që ka ngritur çështjen e Kosovës”, ia ktheu Balla.
/vizionplus.tv
