Ministri i Brendshëm, Sandër Lleshaj takoi sot ambasadoren e re të SHBA-ve, Yuri Kim.
Përmes një postimi në “Twitter”, Lleshaj u shpreh se diskutuan për çështje me rëndësit, ku ndanë edhe vlerësime sa I përket nevojës për të luftuar krimin e organizuar dhe korrupsionin.
“Me kënaqësi prita dhe takova sot Ambasadoren e re të SHBA në Shqipëri, Yuri Kim. Ndamë vlerësime të njëjta për nevojën e një faze të re në luftën kundër krimit të organizuar dhe trafiqeve, për rolin e pazëvendësueshëm të Policisë së Shtetit për suksesin e reformës në drejtësi, për projekte të reja bashkëpunimi me SHBA, për thellim të partneritetit mes institucioneve të sigurisë nga të dyja vendet dhe për çështje të tjera me rëndësi.”
Ndër të tjera, Lleshaj nënvizoi se SHBA-të vijojnë të jenë partneri strategjik i Shqipërisë, në mbështetje të përparimit të gjithanshëm të vendit.
Yuri Kim e nisi punën në Tiranë ditën e hënë, ndërsa në fjalën e saj të parë premtoi mbështetje maksimale të SHBA për reformën në drejtësi dhe luftën kundër korrupsionit e krimit të organizuar.
