Kryeministri i Shqipërisë, Edi Rama, ka marrë pjesë në Konferencën për Rindërtimin e Ukrainës (Ukraine Recovery Conference – URC 2026), ku ka mbajtur një fjalë të shkurtër në sesionin plenar të saj.
Duke iu drejtuar pjesëmarrësve, Rama theksoi se ideja kryesore e takimit është e qartë dhe urgjente, rindërtimi i Ukrainës nuk mund të presë përfundimin e luftës.
Rama nënvizoi se ndërsa Ukraina po rindërtohet, ajo njëkohësisht po mbron veten.
Rama: Jam i sigurt se kontributi më i mirë që prisni nga unë është një fjalë e shkurtër, dhe këtë do të bëj. Besoj se koncepti i këtij takimi është shumë i thjeshtë; nëse rindërtimi pret derisa të bjerë plumbi i fundit, atëherë do të jetë shumë vonë. Dhe pikërisht për këtë aryse jemi këtu sot. Ndërkohë Ukraina po rindërtohet, ndërsa njëkohësisht po e mbron veten. Ky është kuptimi i madh i kësaj konference. Shqipëria është këtu me një bindje shumë të thjeshtë; Ukraina duhet ta sigurijë paqen me të njëjtën vendosmëri me të cilën po mbron lirinë e saj. Nga ana tjetër, ne e shohim rindërtimin e Ukrainës dhe integrimin evropian të Ballkanit Perëndimor si procese që përforcojnë njëri-tjetrin. Të dyja kanë të bëjnë me plotësimin e Evropës, forcimin e qëndrueshmërisë së saj dhe uljen e cenueshmërive strategjike. Natyrisht rindërtimi nuk është bamirësi, por strategji. Nuk bëhet fjalë vetëm për të riparuar atë që është shkatërruar por për të ndërtuar një Ukrainë demokratike, evropiane, moderne dhe të qëndrueshme, duke treguar se e gjithë Evropa është e aftë ta bëjë këtë. Ukraina po rindërton guximin e Evropës, Evropa duhet të ndihmojë në rindërtimin e së ardhmes së Ukrainës.
Konferenca synon të forcojë mbështetjen ndërkombëtare për Ukrainën dhe të mobilizojë investime për rindërtimin dhe zhvillimin afatgjatë të vendit. Punimet e saj do të fokusohen në sektorët më të prekur nga agresioni rus, përfshirë energjinë, infrastrukturën kritike dhe logjistikën, si dhe në forcimin e kapaciteteve të sigurisë dhe mbrojtjes, të konsideruara thelbësore për procesin e rindërtimit.
