Rreth 30 kursantë të Akademia e Sigurisë kanë marrë ndihmë mjekësore pasi kanë shfaqur simptoma të forta të dyshuara si pasojë e një helmimi ushqimor.
Burime bëjnë me dije se mbrëmjen e djeshme kursantët kanë shfaqur të vjella, diarre, temperaturë dhe dhimbje koke. Ata janë transportuar në grupe drejt spitalit, ku kanë marrë trajtimin e nevojshëm mjekësor.
Ky është rasti i dytë i ngjashëm që raportohet brenda pak muajsh në Akademinë e Sigurisë, duke ngritur shqetësime mbi kushtet dhe sigurinë ushqimore në institucion.
Kujtojmë se kompania e kateringut të ushqimit SORI-AL, u zhbllokua nga Autoriteti Kombëtar i Ushqimit (AKU) në muajin maj pas helmimit të 52 studentëve te Akademia e Sigurisë në Sauk. SORI-AL rinisi sërish aktivitetin në Akademia e Sigurisë pasi ishte gjobitur me 1.5 milionë lekë për ushqim të pasigurt dhe kushte të papërshtatshme higjeno-sanitare.
Ndërkohë, Policia e Shtetit dhe Agjencia e Mbikëqyrjes Policore kanë nisur hetimet për të zbardhur shkaqet e ngjarjes. Janë marrë kampione për analiza laboratorike, të cilat pritet të përcaktojnë nëse komplikacionet shëndetësore janë shkaktuar nga ushqimi i konsumuar apo nga faktorë të tjerë.
Autoritetet nuk kanë dhënë ende një njoftim zyrtar mbi rezultatet e analizave, ndërsa hetimet vijojnë.
/vizionplus.tv
