Pas vizitës së komisionerit europian për zgjerimin dhe fqinjësinë Oliver Varhelji në Shkup dhe Sofje, Bullgaria duket se nuk ka ndryshuar qëndrim në raport me Maqedoninë e Veriut.
Kryeministri Stefan Janev ka konfirmuar se samiti i BE me vendet e Ballkanit Perëndimor më 6 tetor, do ti gjejë të dyja vendet në dialog por nuk pritet progres deri në fund të këtij viti.
“Pretendimet bullgare janë dëgjuar mjaft mirë si nga pala maqedonase ashtu edhe nga partnerët e saj evropianë. Bullgaria dëshiron të ndalojë gjuhën e urrejtjes, si dhe edukimin për urrejtjen ndaj Bullgarisë. Formula e duhur do të gjendet, në një të ardhme të afërt. Pas fundit të tetorit dhe nëntorit, kur do të ketë zgjedhje politike në Maqedoninë e Veriut dhe Bullgari, dialogu do të fitojë kuptim të ri.”
Megjithatë kryeministri Janev këmbëngul se Sofja nuk do të pranojë shantazh për asnjë arsye.
“Nuk do të ketë ndryshim në pozicionin bullgar, sepse ai u vendos nga Asambleja Kombëtare Bullgare, nuk do të pranojmë shantazh, mosmarrëveshjet mes dy vendeve fqinje nuk duhet të transferohen në Bashkimin Europian.”
Nga ana tjetër Shkupi zyrtar përsërit se cështjet e identitetit nuk do të hidhen në asnjë tryezë negociatash. Kësisoj dialogu mes dy vendeve duket se ka mbetur në vend numëro. Megjithatë, presidentja e Komisonit Europian, Ursula Von Der Leyen gjatë vizitës së saj në Tiranë dhe Shkup javën e kaluar, deklaroi me vendosmëri se unioni do të marrë një vendim pozitiv për konferencën e parë ndërqeveritare me Shqipërinë dhe Maqedoninë e Veriut, deri në fund të këtij viti.
