Spanja, Irlanda dhe vende të tjera anëtare të Bashkimit Evropian planifikojnë të njohin një shtet palestinez më 21 maj, tha të enjten vonë shefi i politikës së jashtme të BE-së Josep Borrell, përpara një votimi në OKB më vonë sot mbi përpjekjet e palestinezëve për t’u bërë anëtarë të plotë të Kombeve të Bashkuara.
Kryeministri spanjoll Pedro Sanchez tha në mars se Spanja dhe Irlanda, së bashku me Slloveninë dhe Maltën, kishin rënë dakord të hidhnin hapat e parë drejt njohjes së një shteti palestinez, duke besuar se një zgjidhje me dy shtete ishte e nevojshme për të arritur paqen e përhershme.
I pyetur nga radio stacioni spanjoll PNE nëse 21 maji do të jetë dita kur Spanja, Irlanda dhe vendet e tjera anëtare të BE-së njohin një shtet palestinez, Borrell tha po, duke përmendur edhe Slloveninë.
“Është një veprim simbolik i natyrës politike. Më shumë se një shtet, ai njeh vullnetin që ky shtet të ekzistojë”, tha ai, duke shtuar se Belgjika dhe vende të tjera ka të ngjarë të ndjekin shembullin. /vizionplus.tv
