“Albania’s Got Talent” çeli siparin në ekranin e televizionit kombëtar Vizion Plus më 11 nëntor, një natë që përmbante gjithçka, lot emocione, batuta e mbi të gjitha spikati talenti.
Konkurrentët e puntatës së parë dhuruan spektakël të vërtetë në performancat e tyre.
Lexo edhe :
Related Posts
Ndërsa takimi i radhës për të zbuluar të tjerë talente do të jetë mbrëmjen e sotme në orën 21:00, anëtari i jurisë Agron Llakaj ka zbuluar në emisionin “7pa5” emocionet e puntatës së parë.
Agron Llakaj: Është një ngjarje e bukur artistike jo vetëm për Vizion Plus, por për Shqipërinë. Është një show shumë familjar, i ngrohtë, të mban lidhur gjatë gjithë kohës. Sa i takon asaj që është më e rëndësishme, unë kam qenë pak skeptik për arsyen se kemi realizuar “Tu si que vales” dhe ka qenë një sukses dhe ka pasur një pjesëmarrje të jashtëzakonshme…mendova se do kishte probleme, por e çuditshmja është që ka ndodhur ndryshe, menjëherë pas spektaklit të parë kanë vërshuar telefonatat. Është e vështirë sepse kërkon një kohë fizike, por pavarësisht se mund të ketë atë lodhjen, të jep kënaqësi.
Si ndihesh që rikthehesh në rolin e jurisë?
Agron Llakaj: Puna që bëj unë me talentet ka të bëjë. Unë nuk jam një natyrë që të bëj jurinë, që ti bën, ti s’bën. Unë dua t’i jap mundësi. Edhe ata që mund të duken të dobët…skena ka hije të rëndë. Në momentin kur del dhe një grup njerëzish presin rezultatin nga ty, fillon emocioni, ajo që nuk të lë të japësh më të mirën. Prandaj ta çlirojmë atë që vjen emocionalisht. Unë nuk lodhem kurrë nga kjo lloj marrëdhënie. Kështu që nuk jam thjesht në statusin e një anëtari të jurisë. Unë e di mirë çdo të thotë të kërkosh një rreze drite.
Performanca e balerinëve të vegjël Beklisa dhe Marvi ishte ajo që preku më së shumti Agron Llakajn për shkak të mesazhit të fortë që përcolli.
Agron Llakaj: Performanca e dy vogëlushëve. Që në momentin që ata thonë “ne jemi si ju” duhet të kuptojmë se është një dashuri e madhe, fatet në jetë kështu janë..më krijoi një emocion. Unë jam një natyrë që kam potencialin që edhe pse jam duke qarë ta mbledh veten. Jeta nuk është një skenar i shkruar në të cilën ti duhet të përgatitesh emocionalisht. Unë kam një profesion siç është humori, qesh dhe kam një fat që dhe qaj.
“Albania’S Got Talent” nga 11 nëntori u bë spektakli i të gjithë shqiptarëve.
Spektaklin mund ta gjeni në kanalin zyrtar të Vizion Plus në Youtube, si dhe në të gjitha rrjetet sociale të Vizion Plus. Ndërsa takimi i radhës për të zbuluar të tjerë talente do të jetë mbrëmjen e sotme në orën 21.00./vizionplus.tv
