Ndërsa sulmet ruse ndaj Ukrainës përshkallëzohen, presioni i brendshëm mbi Donald Trump po rritet që të vendosë sanksione kundër Moskës.
Senatorët republikanë dhe këshilltarët e Shtëpisë së Bardhë po i bëjnë thirrje Trump që të pranojë ose të paktën të mos bllokojë vendosjen e masave të ashpra ekonomike, në një kohë kur strategjia e dialogut me Vladimir Putin duket se nuk po jep efekt.
Pavarësisht rezervave të tij për muaj të tërë në lidhje me sanksionet, të cilat shpesh i konsideron joefektive dhe të tepruara, thuhet se Trump tani po i shqyrton seriozisht ato.
Siç kanë thënë zyrtarë të lartë qeveritarë, pakënaqësia e Trump me Putin po rritet.
“Ai gjithmonë kërkon mënyra të ndryshme për të ushtruar presion. Dhe kjo nuk bën përjashtim”, tha një këshilltar i lartë i Shtëpisë së Bardhë.
Mendime mbi sanksionet e reja dhe tarifat 500% për vendet që blejnë naftë ruse
SHBA-të kanë përgatitur tashmë një paketë sanksionesh të reja kundër Rusisë, duke u përqendruar në sektorët bankarë dhe të energjisë, të cilat mund të zbatohen në çdo kohë me urdhër të presidentit.
Ndër skenarët që po shqyrtohen është mbështetja indirekte për një propozim legjislativ të paraqitur së fundmi nga senatorët Lindsey Graham (republikan) dhe Richard Blumenthal (demokrat), i cili parashikon vendosjen e tarifave prej 500% për produktet nga vendet që vazhdojnë të blejnë energji ruse.
I believe president trump was sincere when he thought his friendship w Putin wld end the war. Now that being the case ITS TIME FOR SANCTIONS STRONG ENUF SO PUTIN KNOWS “game over”
— Chuck Grassley (@ChuckGrassley) May 27, 2025
Sipas zyrtarëve qeveritarë, ky propozim mund t’i ofrojë Trumpit mundësinë për të mbajtur komunikim të hapur me Putinin, ndërkohë që përgjegjësinë për sanksionet ia kalon Kongresit.
Në të njëjtën kohë, po merren në konsideratë edhe të ashtuquajturat “sanksione dytësore”, pra kufizime jo vetëm kundër Rusisë, por edhe kundër vendeve të treta që vazhdojnë të tregtojnë me të./vizionplus.tv
