Megjithëse një nga 5 qytetet e vogla shqiptare, Puka është kthyer vitet e fundit në një prej destinacioneve të preferuara turistike. Për ata që duan freskinë e bjeshkëve, ajrin e pastër, aventurën dhe shijimin e produkteve bio, të gjitha mund të gjenden vetëm 60km larg Shkodrës dhe 145km larg Tiranës.
Kjo qytezë alpine njihet për masivin e madh pyjor të pishave, me një sipërfaqe prej 400 hektarësh, por edhe si bazë për ushtrimin e alpinizmit, në malin e Munellës, Bjeshkët e Tërbunit dhe mali i Krrabit.
Turisët e huaj
“Shqipëria është perfekte. Hera e parë që vi dhe u mahnita nga bukuritë që po shoh. Ma sugjeruan miqtë dhe morëm këtë tur me motorë. Ja vlejti dhe do të kthehemi sërish pasi malet këtu janë shumë tërheqëse. Më pëlqeu dhe mikpritja, nuk e gjen kudo.”
“Shqipëria është një vend i mrekullueshëm. Keni male shumë të bukura, njerëz mikpritës dhe tradita të veçanta që të tërheqin menjëherë. Turi Ballkanik është impresionues dhe kjo nuk është hera e parë që vi, kam qenë edhe më herët, por kjo është e para me motor. Për vendin nuk kam çfarë të them por ajo që nevojitet është disiplina në rrugë sepse është një kaos udhëtimi në to, duhet shumë kujdes. Më pëlqyen kthesat por ka nevojë për mirëmbajtje.”
Por turizmi në Pukë po zhvillohet mes një mori vështirësish, pasi kapacitetet pritëse janë të ulëta. Investimet nga private janë të pakta pasi zona vuan mungesën e certifikatave të pronësisë. Përparim Laci e ka ndërtuar hanin e tij prej më shumë se një dekade dhe sot kërkon që këtë shembull ta ndjekin dhe të tjerë.
PËRPARIM LAÇI
PRONAR BUJTINE
Fati i keq i Pukës është që nuk ka vende akomoduese, ka shumë shumë pak dhe është turp ta themi këtë, dhe për më tepër që nuk ka as nxitje për t’i shtuar këto hapësira.
Shqetësimin e pranon edhe kryebashkiaku i ri Rrok Dodaj.
RROK DODAJ
KRYETAR I BASHKISË PUKË
E dimë që kemi një problem dhe do ta kemi në fokus certifikimin e pronave por do të ketë dhe mbështetje për ata që duan të investojnë.
Resurset turistike të Pukës janë të shumta dhe nuk mund të shfrytëzohen në pak kohë.
Puka mbetet një destinacioneve që mirëpret vizitorë në ccdo stinë të vitit.
