“Gjuha dhe identiteti i Maqedonisë së Veriut nuk do të negociohen”. Kështu u shpreh kryeministri maqedonas Dimitar Kovaçevski, duke i referuar bisedimeve me Bullgarinë për të arritur një marrëveshje që do të zhbllokonte procesin e anëtarësimit në bashkimin evropian.
DIMITAR KOVAÇEVSKI
KRYEMINISTER, MV“Gjuha dhe identiteti nuk diskutohen dhe as negociohen. Gjuha jonë është e shkruar qartë në Kombet e Bashkuara dhe gjithashtu është e shënuar qartë në dokumentet e BE-së. Për momentin janë shkëmbyer vetëm dokumentet e punës, të cilat do të publikohen kur të përcaktohet korniza. Atëherë do të kemi arritur edhe në një marrëveshje përfundimtare.”
Kovaçevski u shpreh optimist se dallimet mes Shkupit dhe Sofjes do të tejkalohen shumë shpejtë.
“Aty ku ka vullnet politik dhe ide për progres, dallimet tejkalohen shumë më lehtë. Së bashku kemi hapur dialog të sinqertë dhe me përkushtim për stabilitet dhe zhvillim të dy shteteve. Kemi nxitur thellimin e miqësisë, fqinjësinë e mirë dhe bashkëpunimin mes dy vendeve. Të dy qeveritë janë te vendosura të udhëheqin politika të ndërtimit të urave, e jo politika të ndërtimit të mureve mes qytetarëve të dy vendeve”
Disa ditë më parë, përfaqësuesit e dy qeverive u takuan në Sofje, ku ranë dakord për të krijuar grupe pune në mënyrë që të zgjidhet sa më shpejtë ngërçi.
Bullgaria ka bllokuar Maqedoninë e Veriut në procesin për hapjen e negociatave me Bashkimin Evropian, për shkak të mosmarrëveshjeve me gjuhën edhe identitetin. Vetoja e Sofjes ka penalizuar edhe Shqipërinë.
