Kryeministri Edi Rama, gjatë intervistës së tij në podcastin “Flasim”, është ndalur edhe te akuzat e ish-krahut të tij të djathtë, Arben Ahmetaj.
Rama theksoi se nuk e kishte ditur se kishte investuar politikisht në një “maskë karnavalesh”.
Më tej, Rama ka komentuar edhe akuzat e SPAK-ut ndaj zyrtarëve të lartë.
“Në rastin që përmendet, unë kisha investuar në një maskë karnavalesh, jo në një aset publik për t’u besuar. Se nëse pastaj del që burimi njerëzor ku ke investuar është i ndotur, dhe njeriu që ti ke parë ka qenë një maskë karnavalesh, atëherë është e dhimbshme, por është fakt. Deri tani s’kam parë ndonjë dorë në buxhetin e shtetit të provuar në gjyq me fakte, akuza po, disa elementë shumë të dukshëm abuzimi për mua dhe për ne në dosjen e sjellë nga SPAK-u për inceneratorët, po, por në buxhet të shtetit ende nuk kam parë ndonjë gjë domethënëse. Po të nisem nga akuzat dhe t’i përdor si argument për të mos e vendosur dikë në detyrë apo ta shkarkoj direkt, duhej të shkarkoja veten time nga mëngjesi deri në darkë, aq shumë sa më akuzojnë mua. Dhe kjo më ka bërë të besoj se edhe të tjerët akuzohen padrejtësisht si unë”, u shpreh Rama.
