Kryeministri i Australisë, Scott Morrison thotë se vaksina e koronavirusit në Universitetin e Queensland “nuk do të jetë në gjendje të vazhdojë”.
Qeveria australiane ka përfunduar marrëveshjen me kompaninë bioteknologjisë CSL për të furnizuar 51 milionë doza të një vaksine Covid-19 që po zhvillohet nga Universiteti i Queensland, pasi pjesëmarrësit në provën e vaksinës rezultuan pozitivë për HIV, rezultate këto të rreme.
Australia kishte shpresuar se vaksina e proteinave do të ishte në dispozicion nga mesi i vitit 2021. Provat klinike të fazës së parë tek njerëzit filluan në korrik në Brisbane.
Mirëpo, këtë të premte kryeministri australian Scott Morrison, tha: “Vaksina e Universitetit të Queensland nuk do të jetë në gjendje të vazhdojë bazuar në këshillat shkencore dhe kjo nuk do të shfaqet më si pjesë e planit të vaksinave të Australisë”.
“Unë mendoj se vendimi që kemi marrë sot duhet t’iu japë australianëve një siguri të madhe se ne po punojmë me kujdes dhe jo me ndonjë nxitim të panevojshëm”, tha ai.
