Dhjetëra banorë të Patosit janë ngritur sërish në protestë paraditen e sotme kundër projektit të reformës së re administrative. Me pankarta në duar, protestuesit kanë bërë thirrje për një mobilizim edhe më të madh në mbrojtje të asaj që e konsiderojnë “kauzë identiteti”.
Banorët kanë shprehur kundërshtimin e tyre ndaj propozimit të Partisë Socialiste për shkrirjen e Bashkisë Patos dhe bashkimin e saj me Bashkinë Fier. Sipas tyre, Patosi ka konsoliduar prej vitesh identitetin e tij si “qyteti i naftëtarëve”, ndërsa performanca e bashkisë, sipas protestuesve, renditet ndër më të mirat në vend.
Protestuesit kanë theksuar gjithashtu kontributin e naftëtarëve në historinë e qytetit. Sipas tyre, rreth 200 naftëtarë kanë humbur jetën në industrinë e naftës. Për këtë arsye, ata kërkojnë që në qendër të qytetit të vendoset edhe busti i një naftëtari, si simbol i identitetit dhe historisë së Patosit.
Në vijim të protestave të mëparshme, banorët kanë paralajmëruar përshkallëzim të protestës. Ata kanë kërkuar gjithashtu të jenë pjesë e një procesi më të gjerë konsultimi për të ardhmen e Bashkisë Patos dhe ndryshimet e propozuara në kuadër të reformës administrative.
