Uashingtoni ka hedhur poshtë pretendimet e ministrit të jashtëm të Koresë së Veriut, i cili tha një ditë më parë se SHBA i ka shpallur luftë.
Zëdhënësja e Shtëpisë së Bardhë Sarah Sanders, e cilësoi absurd ketë qëndrim. Ajo theksoi se Shtetet e Bashkuara do vazhdojnë të kërkojnë denuklearizimin paqësor në gadishullin Korean.
“Ne do vazhdojmë të kërkojmë denuklearizimin paqësor të gadishullit korean. Fokusi ynë është ta realizojmë një gjë të tille përmes presionit maksimal ekonomik dhe politik, dhe kjo gjë është e mundur.”
Por ndërkohë zëdhënësi i Pentagonit tha se nëse Kim Jong Un nuk i jep fund provokimeve, atëherë SHBA do të sigurohet t’i garantojë presidentit Trump opsionet më të mira për t’u përballur me Korenë e Veriut.
Shfaqjet ushtarake të SHBA-së dhe Koresë së Veriut, të përziera me kërcënime dhe kundër-kërcënime, sipas ekspertëve ushtarake, mund të kenë një rezultat tragjik. Qeveria koreano-jugore kërkon qetësi nga të dyja palët, pasi janë qytetarët ata që do të vuajnë pasojat.
