Zjarret masive në jugperëndim të Francës kanë detyruar autoritetet të urdhërojnë evakuimin e plotë të gadishullit turistik Cap Ferret.
Mbi 40 mijë banorë dhe turistë janë larguar nga zona, ndërsa disa prej tyre janë transportuar me varka për shkak të përhapjes së flakëve.
Zjarri, i cili nisi të martën në rajonin e Girondës ka djegur rreth 8 mijë e 700 hektarë tokë. Dhjetëra banesa janë shkatërruar, ndërsa zjarrfikësit vijojnë përpjekjet për të vënë nën kontroll situatën.
Presidenti francez Emmanuel Macron e cilësoi situatën shumë kritike dhe kërkoi ndihmë nga Bashkimi Evropian. Franca pritet të marrë mbështetje me avionë zjarrfikës nga Kroacia, Portugalia, Republika Çeke dhe Sllovakia.
Ndërkohë, edhe Spanja po përballet me zjarre të mëdha. Qeveria spanjolle ka shpallur gjendje të jashtëzakonshme kombëtare, pasi flakët kanë dalë jashtë kontrollit në disa zona pranë Madridit.
Në Itali, situata është veçanërisht problematike në Sicili, ku ekipet e emergjencës vazhdojen luftojnë me disa vatra zjarri. Mijëra persona janë detyruar të largohen nga zonat e rrezikuara, ndërsa një zjarrfikës humbi jetën gjatë operacionit për shuarjen e flakëve.
Edhe vende të tjera të Mesdheut, si Portugalia, Turqia dhe disa zona të Ballkanit, janë përballur me vatra zjarri gjatë kësaj vere, ndërsa thatësira dhe valët e të nxehtit kanë krijuar kushte ideale për përhapjen e flakëve.
/vizionplus.tv
