Vetëm 5 orë pas vrasjes së 20-vjeçarit francez në Ksamil, Policia ka arritur të arrestojë autorin e dyshuar të ngjarjes.
Në pranga ka rënë shtetasi Sokrat Vata, 29 vjeç, i cili dyshohet se goditi me thikë për vdekje 20-vjeçarin Miguel Mendez, pas një konflikti për motive të dobëta.
Kapja e tij u bë në aksin rrugor Levan-Fier, pas koordinimit të shërbimeve të Drejtorisë Vendore të Policisë Vlorë me ato të Drejtorisë Vendore të Policisë Fier.
Sipas Policisë, 29-vjeçari ishte fshehur në bagazhin e një automjeti që drejtohej nga një 31-vjeçare, shtetase turke. Në makinë ndodhej gjithashtu edhe një 38-vjeçar, shtetas turk.
Automjeti u ndalua në një pikë të përbashkët kontrolli të ngritur në aksin Levan-Fier, ku shërbimet operacionale të Vlorës, në bashkëpunim me forcën “Shqiponja” të Fierit, kanë bërë të mundur kapjen e të dyshuarit.
29-vjeçari dhe dy shtetasit turq janë shoqëruar në Drejtorinë Vendore të Policisë Vlorë për veprime të mëtejshme procedurale.
Ndërkohë, grupi hetimor, nën drejtimin e Prokurorisë, vijon hetimet për dokumentimin e plotë të rrethanave të vrasjes në Ksamil.
