“Mami, boshllëku që ke lënë është i pashpjegueshëm, ende nuk arrij ta besoj. Më duket si një makth”. Këto janë fjalët e dhimbshme të Maria Cosentinos, vajzës së Ornella Forastefanos, 46-vjeçares e cila u gjet në gjendje të rëndë para spitalit të Trebisacce në Itali dhe më pas ndërroi jetë nga plagët e marra, në atë që dyshohet të ketë qenë një sulm.
Partneri i Ornella Forastefanos, një shtetas shqiptar 42-vjeçar, është ndaluar në portin e Barit, në Itali, teksa dyshohet se po përgatitej të largohej drejt Shqipërisë.
Në një mesazh të gjatë të publikuar në Facebook, vajza përshkruan dhimbjen e humbjes së papritur dhe lidhjen e fortë që kishte me nënën e saj. “Kur erdhi ajo telefonatë, mund të imagjinoja gjithçka, por jo që të mos të shihja më kurrë”, shkruan Maria, duke treguar se për të nëna ishte jo vetëm prindi i saj, por edhe shoqja më e mirë.
Letra e vajzës për nënën
“Unë jam e fortë, mami, por ende kisha nevojë për ty, për nënën time dhe jo vetëm për mamin, por për shoqen time më të mirë, atë person që ishte gjithmonë aty kur kisha një problem, supin ku mund të mbështetesha kur rrëzohesha, dhe anasjelltas, ti tek unë.
Na rrite e vetme, duke bërë një mijë sakrifica. Mos u shqetëso, do të kujdesem unë për Ettoren sikur të ishe ti, edhe pse asgjë nuk do të jetë më kurrë njësoj pa ty.
Shpresoj që aty ku je tani të jetë një vend më i mirë, e rrethuar nga argëtimi, ashtu siç të pëlqente ty, dhe nga ditët në det duke marrë rreze dielli.
Ende doja të të bëja gjyshe dhe ti me siguri do të ishe zemëruar nëse do të të quanin gjyshe, sepse thoshe se ishe shumë e re. Por e di që do t’i kishe dashur që në çastin e parë.
Të dua përgjithmonë, mami, dhe do të jem gjithmonë një grua e fortë, ashtu siç më mësove ti. Shpresoj që të gjesh paqen tënde, sepse nuk jemi vetëm. Ke krijuar dy fëmijë që do të jepnin jetën për njëri-tjetrin dhe do t’i japim forcë njëri-tjetrit, ashtu siç do të doje ti.”
/vizionplus.tv
