Ka nisur sot në Oakland të Kalifornisë gjyqi federal ndaj Metës, kompanisë mëmë të Facebook dhe Instagram, në një prej proceseve më të rëndësishme ligjore në SHBA lidhur me ndikimin e rrjeteve sociale te fëmijët dhe adoleshentët.
Padia është ngritur nga një koalicion prej 29 shtetesh amerikane, ndërsa në proces po udhëheqin çështjen Kalifornia, Kolorado, Kentucky dhe Neë Jersey.
Shtetet akuzojnë Metën se ka projektuar Facebook dhe Instagram me veçori që nxisin përdorimin e tepruar dhe varësinë te të miturit, se ka minimizuar ose fshehur rreziqet që platformat paraqesin për shëndetin mendor të të rinjve dhe se ka mbledhur të dhëna nga fëmijë nën 13 vjeç pa pëlqimin e prindërve.
Prokurorët kërkojnë edhe ndryshime të rëndësishme në mënyrën se si funksionojnë platformat, përfshirë masa më të forta për mbrojtjen e të miturve. Ata pretendojnë se Meta ka vendosur angazhimin dhe fitimin përpara sigurisë së përdoruesve të rinj.
Një nga pikat më të debatueshme të procesit është shuma e mundshme e penaliteteve. Shtetet kanë llogaritur një shumë prej rreth 193 miliardë dollarësh, ndërsa Meta paralajmëron se ekspozimi teorik mund të jetë edhe shumë më i lartë, deri në rreth 1.4 trilionë dollarë, në varësi të mënyrës se si do të llogariten shkeljet.
Shifra nuk përfaqëson një gjobë të paracaktuar me ligj, por rezulton nga mënyra se si ligjet e ndryshme të mbrojtjes së konsumatorit mund të aplikohen për shkelje individuale.
Procesi po zhvillohet nën drejtimin e gjyqtares federale Yvonne Gonzalez Rogers. Është ngritur një juri këshilluese prej tetë personash, vendimi i së cilës nuk do të jetë detyrues për gjyqtaren, por do të shërbejë si orientim në vendimmarrje. Gjyqi pritet të zgjasë rreth gjashtë deri në tetë javë.
Meta i mohon akuzat dhe argumenton se varësia nga rrjetet sociale mbetet objekt debati shkencor. Kompania thekson gjithashtu se ka ndërmarrë masa për sigurinë e adoleshentëve, përfshirë krijimin e “llogarive adoleshente” në vitin 2024.
Çështja shihet si një test i rëndësishëm për përgjegjësinë e kompanive të teknologjisë ndaj të miturve. Përveç pasojave të mundshme financiare, një vendim kundër Metës mund të detyrojë kompaninë të ndryshojë në mënyrë të konsiderueshme mënyrën se si Facebook dhe Instagram funksionojnë për përdoruesit e rinj dhe mund të ndikojë edhe në procese të ngjashme kundër platformave të tjera të mëdha sociale.
